Policia e Kosovës në rajonin e Prishtinës ka zhvilluar aktivitete operative javën e kaluar në lokacione të ndryshme të kryeqytetit.
Zyrtarët policorë realizuan 210 urdhëresa të gjykatës, prej tyre 32 për vepra penale, ndërsa të tjerat për kundërvajtje, seanca gjyqësore dhe verifikime. Pas përfundimit të procedurave policore, personat e dënuar me burgim u dërguan për vuajtje të dënimit, ndërsa ata me gjobë u liruan pasi kryen obligimet e caktuara në urdhëresa.
Aktivitetet policore u shtrinë edhe në segmente të tjera të sigurisë. Gjatë kësaj periudhe u sekuestruan 4 armë zjarri të llojeve dhe kalibrave të ndryshëm, si dhe municione.
Në fushën e sigurisë rrugore, policia shqiptoi 5185 masa administrative me gjobë për shkelje të Kodit Rrugor. Prej tyre, 578 masa u evidentuan nga vetura inteligjente dhe radar mobil.