Policia e Shtetit ka njoftuar më 25 prill se ka konstatuar një skemë mashtrimi online. Autorë të paidentifikuar kanë krijuar faqe interneti të rreme, të ngjashme me faqen zyrtare të policisë, me qëllim përfitimin e paligjshëm financiar.
Këto faqe shpërndahen përmes mesazheve SMS dhe adresash email të maskuara. Ato paraqiten si njoftime zyrtare nga autoritetet shtetërore për pagesën e gjobave të papaguara, kryesisht për shkelje të qarkullimit rrugor si tejkalimi i shpejtësisë. Policia sqaron se këto mesazhe nuk janë dërguar nga institucionet shtetërore.
Autorët përdorin teknika të sofistikuara për të mashtruar qytetarët dhe për t’i orientuar drejt faqeve të rreme, ku u kërkohet vendosja e të dhënave bankare. Qëllimi është vjedhja e të dhënave dhe përvetësimi i fondeve nga llogaritë bankare.
Këshilla nga Policia e Shtetit
- Mos klikoni në linke të dyshimta të ardhura përmes SMS apo platformave të tjera.
- Mos vendosni të dhënat bankare në faqe të pa verifikuara.
- Verifikoni çdo gjobë vetëm në kanalet zyrtare, si portalin e-Albania: https://e-albania.al/eAlbaniaServices/UseService.aspx?service_code=879.
Në rast se dikush ka vendosur të dhënat bankare në faqe të dyshimta, policia këshillon:
- Të kontaktohet menjëherë banka për bllokimin e kartës ose llogarisë.
- Të bëhet denoncimi pranë Policisë së Shtetit.
Strukturat ligjzbatuese po punojnë për identifikimin dhe ndjekjen penale të autorëve.