Autoriteti Kombëtar për Sigurinë Kibernetike (AKSK) njoftoi se po qarkullon një skemë mashtrimi përmes mesazheve telefonike (SMS), të cilat paraqiten në mënyrë të rreme si njoftime nga Policia Rrugore për shkelje të pretenduara të qarkullimit rrugor. Këto mesazhe synojnë të vjedhin të dhënat financiare të qytetarëve, duke krijuar ndjenjë urgjence.
Sipas AKSK-së, elementet dalluese të këtyre mesazheve janë:
- Dërgimi nga numra të huaj dhe të panjohur.
- Përfshirja e lidhjeve (links) të dyshimta.
- Vendosja e afateve të shkurtra për kryerjen e pagesës.
- Kërcënime për masa administrative ose oferta për ulje të vlerës së gjobës.
Autoriteti këshillon qytetarët që të tregohen vigjilentë dhe të mos ndërveprojnë me këto mesazhe. Në rast se qytetarët kanë dhënë tashmë të dhëna bankare, ata duhet të lidhen menjëherë me bankën e tyre për të bllokuar llogaritë dhe për të shmangur dëmet financiare. Gjithashtu, rekomandohet bllokimi i numrit dërgues dhe raportimi i mesazhit si spam.
AKSK thekson se institucionet publike në Shqipëri nuk kërkojnë kurrë pagesa, fjalëkalime apo të dhëna bankare përmes lidhjeve të dërguara nga numra të panjohur. Për çdo verifikim, qytetarët duhet t'i drejtohen vetëm kanaleve zyrtare të komunikimit të institucioneve shtetërore.