Autoriteti Kombëtar për Sigurinë Kibernetike (AKSK) ka njoftuar një rritje të ndjeshme të fushatave të ashtuquajtura "phishing" dhe "smishing" në Shqipëri. Këto tentativa keqdashëse synojnë përvetësimin e kredencialeve bankare dhe informacioneve personale, duke shfrytëzuar emrin, logon dhe identitetin vizual të institucioneve të njohura, përfshirë bankat dhe Postën Shqiptare.
Sipas AKSK, mesazhet mashtruese krijojnë një ndjesi urgjence për ta shtyrë marrësin drejt veprimeve të nxituara. Pretendimet më të shpeshta përfshijnë:
• Aktivitet të pazakontë në llogari bankare;
• Kërkesa për pagesa apo konfirmim adresash për dërgesa postare;
• Paralajmërime për bllokim ose pezullim të shërbimeve bankare.
Autoriteti thekson se asnjë institucion serioz nuk kërkon ndarjen e fjalëkalimeve, kodeve të verifikimit njëpërdorimësh (OTP) ose të dhënave të kartave përmes kanaleve të pasigurta. Nëse qytetarët marrin mesazhe të këtij lloji, rekomandohet që të mos ndërveprojnë me to.
Për sigurinë e të dhënave, AKSK u bën thirrje qytetarëve që të ndjekin këto hapa:
• Verifikoni çdo komunikim vetëm përmes faqeve zyrtare të institucionit përkatës;
• Kontrolloni me vëmendje adresën e faqes (URL) para çdo veprimi;
• Raportoni çdo mesazh të dyshimtë pranë AKSK-së dhe institucionit që po imitohet;
• Kontaktoni bankën tuaj nëse dyshoni se keni ndarë të dhëna sensitive.
Institucioni nënvizon se vigjilenca mbetet thelbësore për mbrojtjen nga këto sulme kibernetike, duke theksuar se një klikim i nxituar mund të mjaftojë për të komprometuar sigurinë e llogarive personale dhe financiare.