Drejtoria Rajonale e Policisë në Prizren ka ngritur alarmin për rritjen e rasteve të mashtrimeve financiare përmes mesazheve telefonike. Sipas njoftimit, qytetarët pranojnë SMS të rreme që pretendojnë se xhirollogaritë bankare do të bllokohen nëse nuk ndërmerren veprime të menjëhershme.
Mesazhet përfshijnë lidhje të dyshimta ku kërkohet të jepen të dhëna personale dhe bankare. Pas futjes së këtyre të dhënave, persona të paautorizuar fitojnë qasje në llogaritë dhe marrin mjetet financiare.
Policia e Kosovës apelon që qytetarët të mos hapin dhe të mos klikojnë lidhje të panjohura të pranuara përmes SMS-ve apo email-eve. Ata duhet të shmangin ndarjen e fjalëkalimeve, kodeve identifikuese dhe të dhënave bankare në platforma të pasigurta.
Autoritetet kanë kërkuar që çdo rast i dyshuar të raportohet menjëherë në polici për të parandaluar mashtrime të tjera dhe për të identifikuar personat përgjegjës. Hetimet po zhvillohen në bashkëpunim me institucionet relevante.