Policia e Kosovës ka lëshuar një njoftim zyrtar për të paralajmëruar qytetarët lidhur me tentativat për mashtrim përmes mesazheve telefonike (SMS). Personat e paidentifikuar po keqpërdorin emrin e institucioneve të Republikës së Kosovës për të njoftuar në mënyrë të rreme për gjoba trafiku të papaguara, duke iu kërkuar marrësve të mesazhit të klikojnë në linqe specifike për kryerjen e pagesave.
Sipas autoriteteve, këto mesazhe nuk janë zyrtare dhe synojnë vjedhjen e të dhënave personale ose financiare të qytetarëve. Policia ka renditur hapat që duhet të ndjekin qytetarët për të shmangur rreziqet:
• Fshini mesazhin menjëherë pas pranimit.
• Mos klikoni në asnjë linqë të dyshimtë të përfshirë në mesazh.
• Mos ofroni të dhëna bankare ose personale në faqe që kërkojnë pagesa përmes SMS-ve.
• Kontaktoni menjëherë bankën tuaj në rast se keni ndarë informacione financiare.
Policia e Kosovës kërkon bashkëpunimin e publikut për raportimin e këtyre rasteve. Qytetarët mund të njoftojnë autoritetet përmes aplikacionit zyrtar "Lajmëro Policinë" ose duke telefonuar në numrin e emergjencës 192.