Autoritetet e sigurisë në vend kanë identifikuar një fushatë mashtruese që po shpërndahet përmes mesazheve telefonike në emër të Policisë së Kosovës. Këto mesazhe u kërkojnë qytetarëve të klikojnë në linqe të dyshimta për të kryer pagesa për gjoba trafiku, të cilat janë inekzistente.
Sipas njoftimit zyrtar, këto komunikime nuk janë të autorizuara nga institucioni dhe kanë për qëllim vjedhjen e të dhënave personale dhe bankare të përdoruesve. Policia e Kosovës thekson se nuk kërkon pagesa përmes linkeve të dërguara nëpërmjet mesazheve të shkurtra (SMS).
Në rast të pranimit të mesazheve të tilla, autoritetet këshillojnë:
• Fshirjen e menjëhershme të mesazhit.
• Mosndarjen e asnjë informacioni personal.
• Kontaktimin e menjëhershëm me bankën përkatëse nëse janë ndarë të dhëna financiare.
• Raportimin e rastit në organet e rendit.
Institucioni njofton se po vijon monitorimin e situatës dhe mbetet i angazhuar në parandalimin e aktiviteteve të tilla kibernetike, duke bërë thirrje për kujdes të shtuar ndaj çdo kërkese të dyshimtë.