Policia e Shtetit ka bërë thirrje për vigjilencë të lartë ndaj një skeme të re të mashtrimeve online që synon vjedhjen e të dhënave personale dhe bankare të qytetarëve. Kjo skemë, e identifikuar si phishing, shfrytëzon mesazhet dërguar përmes SMS-ve dhe aplikacioneve si WhatsApp, ku autorët paraqiten në mënyrë të rreme si përfaqësues të institucioneve bankare.
Në këto mesazhe, qytetarëve u kërkohet urgjentisht të përditësojnë të dhënat ose të verifikojnë llogaritë duke klikuar në një link të bashkëngjitur. Policia thekson se këto linqe çojnë në faqe interneti të rreme, të krijuara për të vjedhur kredencialet e e-banking, kodet e verifikimit (OTP), PIN-et dhe të dhënat e kartave bankare. Pasi këto të dhëna bien në duart e autorëve, ato përdoren për kryerjen e transaksioneve të paautorizuara, duke shkaktuar dëme financiare për viktimat.
Autoritetet kanë këshilluar një sërë masash mbrojtëse për qytetarët:
• Shmangia e klikimit të çdo linku të ardhur nga numra të panjohur ose të dyshimtë.
• Ruajtja e konfidencialitetit të fjalëkalimeve, kodeve OTP, PIN-eve dhe të dhënave të kartës bankare.
• Verifikimi i adresës së faqes së internetit përpara çdo identifikimi në shërbimet bankare online.
• Përdorimi ekskluziv i numrave dhe kanaleve zyrtare të bankës për çdo komunikim.
Në rast se një qytetar ka klikuar në një link të dyshimtë ose ka ndarë të dhëna bankare, Policia udhëzon kontaktimin e menjëhershëm të bankës për bllokimin e kartës ose llogarisë, ndryshimin e fjalëkalimeve të aksesit dhe raportimin e rastit në Drejtorinë për Hetimin e Krimeve Kibernetike ose pranë drejtorive vendore të Policisë.
Përditësime
Autoriteti Kombëtar për Sigurinë Kibernetike (AKSK) konfirmoi rritjen e fushatave të mashtrimit, të cilat përveç SMS-ve dhe WhatsApp-it, po përhapen tashmë edhe përmes email-eve. Autorët shfrytëzojnë emrin, logon dhe identitetin vizual të bankave për të rritur besueshmërinë te qytetarët. Mesazhet përdorin taktika psikologjike për të nxitur urgjencë, duke simuluar njoftime për bllokime të shërbimit ose aktivitete të dyshimta në llogari.