Autoriteti Kombëtar për Sigurinë Kibernetike (AKSK) ka lëshuar një paralajmërim zyrtar mbi shtimin e rasteve të mashtrimit kibernetik që synojnë klientët e institucioneve bankare në vend. Sipas autoritetit, fushatat e organizuara përmes metodave phishing dhe smishing përdorin emrin dhe logot e bankave për të krijuar përshtypjen e komunikimeve zyrtare.
Sipas raportit të AKSK-së, mesazhet e dërguara nëpërmjet SMS-ve ose email-eve kërkojnë veprime të menjëhershme nga përdoruesit, duke shfrytëzuar ndjesinë e urgjencës për të përfituar të dhëna konfidenciale. Mesazhet më të shpeshta përmbajnë pretendime për:
• Aktivitet të pazakontë në llogarinë bankare;
• Bllokim ose pezullim të shërbimit të ofruar;
• Nevojë urgjente për konfirmimin e të dhënave personale.
Autoriteti këshillon qytetarët që të tregohen të kujdesshëm dhe të verifikojnë çdo adresë elektronike (URL) përpara se të klikojnë mbi lidhjet e dërguara. Gjithashtu, theksohet rëndësia e mbrojtjes së të dhënave sensitive, si kodet OTP, PIN-in, fjalëkalimet dhe të dhënat e kartës, të cilat nuk duhet të ndahen përmes kanaleve të pasigurta. Nëse qytetarët dyshojnë se kanë rënë pre e ndonjë mashtrimi, udhëzohen të kontaktojnë menjëherë bankën e tyre për të ndjekur procedurat e sigurisë.