Specialistët e Sektorit për Hetimin e Krimeve të Rënda pranë Drejtorisë Vendore të Policisë Tiranë finalizuan operacionin e koduar Risku, i cili çoi në prangosjen e shtetasit Juljan Koni, 43 vjeç. Arrestimi u krye në fshatin Bërxullë, ku gjatë kontrollit në banesën e tij, forcat e rendit gjetën dhe sekuestruan një armë zjarri pistoletë, të pajisur me krëhër dhe 7 fishekë.
Sipas njoftimit zyrtar, operacioni kishte për qëllim identifikimin dhe ndalimin e personave që mbajnë armë pa leje dhe që mund të përbëjnë rrezik për përfshirje në veprimtari kriminale. Materialet procedurale i janë referuar Prokurorisë së Tiranës për hetime të mëtejshme mbi veprën penale të armëmbajtjes pa leje.
Kontrollet në këtë zonë janë intensifikuar pas vrasjes së 50-vjeçarit Edmond (Ali) Sula, por aktualisht nuk është raportuar për një lidhje direkte të të arrestuarit me këtë ngjarje.