Një 41-vjeçar, banues në Tiranë, është vënë në pranga pasi akuzohet për vjedhjen me dhunë të një shtetaseje gjermane, të identifikuar si T. K., 50 vjeçe. Ngjarja ka ndodhur në zonën e Liqenit Artificial, ku i dyshuari, i identifikuar nga policia si J. S., ka kërcënuar 50-vjeçaren me thikë për t'i marrë çantën me sende personale.
Pas kallëzimit të bërë, shërbimet e Komisariatit të Policisë Nr. 1 kanë organizuar operacionin policor të koduar Reaction. Si rezultat i veprimeve të shpejta hetimore, autori është identifikuar dhe ndaluar në kohë rekord. Sendet e vjedhura janë gjetur dhe i janë dorëzuar shtetases gjermane.
Një ditë pas ngjarjes, 50-vjeçarja është paraqitur në ambientet e Komisariatit të Policisë Nr. 1 për të shprehur mirënjohjen ndaj punës së efektivëve. Burimet raportojnë se gjatë këtij takimi, ajo ka vlerësuar profesionalizmin e policisë, ndërsa burimi i Shekullit shton se ajo u ka dhuruar efektivëve edhe ëmbëlsira si shenjë falënderimi. Materialet procedurale janë referuar në Prokurori për veprime të mëtejshme, për veprën penale të vjedhjes me dhunë.
Përditësime
Hetimet zbardhën detaje të reja mbi ngjarjen e ndodhur ditën e martë. I dyshuari, i identifikuar si J. S., rezulton të jetë banues në Tiranë. Shtetasja gjermane është paraqitur në Komisariatin e Policisë Nr. 1 të mërkurën, një ditë pas incidentit, për të identifikuar autorin dhe për të tërhequr sendet e sekuestruara.