Shërbimet e Drejtorisë Vendore për Kufirin dhe Migracionin (DVKM) Vlorë kanë shtuar kontrollet përgjatë vijës bregdetare për të garantuar sigurinë detare gjatë sezonit turistik. Si pasojë e këtyre operacioneve, dy drejtues gomonesh janë ndëshkuar me masa administrative për shkak të lundrimit të rrezikshëm pranë zonave të frekuentuara nga pushuesit.
Rasti i parë u evidentua pas një njoftimi qytetar për një gomone që lundronte pranë bregut në zonën e Potamit. Mjeti u lokalizua dhe u bllokua nga efektivët në plazhin e Drimadhes, ndërsa drejtuesi i tij, shtetasi H. L., u gjobit me 500 000 lekë.
Në rastin e dytë, gjatë patrullimeve rutinë në zonën e njohur si “Plazhi i Hidrovorit”, policia ndaloi një tjetër mjet lundrues që lëvizte në shkelje të rregullave të sigurisë. Drejtuesi i mjetit, shtetasi E. Sh., u ndëshkua me 510 000 lekë, pasi, përveç rrezikimit të pushuesve, verifikimet treguan se ai nuk dispononte dokumentacionin e kërkuar nga ligji.
Policia e Shtetit bëri me dije se do të vijojë patrullimet në të gjithë hapësirën detare të qarkut Vlorë. Autoritetet u kanë bërë thirrje qytetarëve dhe pushuesve që të denoncojnë çdo rast paligjshmërie në det, duke garantuar reagim të menjëhershëm ndaj çdo njoftimi.