Shërbimet e Policisë Kufitare dhe të Njësisë Policore Detare kanë ndërhyrë gjatë një kontrolli rutinë në zonën e ankorimit të mjeteve lundruese në Triport, Vlorë, ku një gomone lëvizte me shpejtësi të lartë dhe kryente manovra që rrezikonin pushuesit dhe mjetet e tjera në det. Pas ndalimit të mjetit, drejtuesi i identifikuar me inicialet A. G. iu nënshtrua testit të alkoolit, i cili konfirmoi se ai ishte në gjendje të dehur.
Në përfundim të veprimeve procedurale, autoritetet vendosën masën administrative prej 50 000 lekësh të rinj ndaj drejtuesit. Përveç gjobës, policia bllokoi lejen e drejtimit për një periudhë 2-mujore, si dhe sekuestroi mjetin lundrues. Policia Kufitare u ka bërë thirrje të gjithë përdoruesve të mjeteve lundruese të respektojnë rregullat e qarkullimit në det për të garantuar sigurinë e jetës së qytetarëve.