Një ngjarje që mund të kishte shkaktuar pasoja të rënda është shmangur këtë të shtunë, më 20 qershor, në zonën detare përballë plazhit të Llamanit. Një gomone është pikasur duke lëvizur me shpejtësi dhe në mënyrë të pakontrolluar, pa asnjë person në bord, duke vënë në rrezik sigurinë e pushuesve dhe të mjeteve të tjera lundruese në atë zonë.
Sipas njoftimit zyrtar, drejtuesi i mjetit, një 35-vjeçar me inicialet E. M., banues në Orikum, kishte rënë në ujë gjatë manovrimit. Ai arriti të dalë në breg në gjirin e Llamanit, ku u konstatua me dëmtime në këmbë. Shtetasi u dërgua për trajtim mjekësor dhe aktualisht ndodhet jashtë rrezikut për jetën.
Neutralizimi i rrezikut u arrit pas ndërhyrjes së koordinuar të Policisë Kufitare dhe Njësisë Policore Detare. Një punonjës i kësaj njësie arriti të hidhej në bordin e mjetit lundrues në lëvizje dhe ta ndalonte atë. Pas kësaj, gomonia u tërhoq në Pikën e Kontrollit Kufitar në Himarë, ku po kryhen verifikimet e mëtejshme për rrethanat e incidentit.
Policia Kufitare theksoi angazhimin e saj për garantimin e sigurisë gjatë sezonit veror dhe ftoi qytetarët që të njoftojnë në numrin e emergjencës 112 për çdo rast nevoje.