Gjatë 24 orëve të fundit, shërbimet e Policisë Kufitare në Himarë kanë zhvilluar dy operacione kërkim-shpëtimi në zonën e Gjirit të Filikurit, duke u ardhur në ndihmë 5 vizitorëve të huaj.
Në rastin e parë, katër turistë – dy shtetas suedezë dhe dy nga Mbretëria e Bashkuar – kishin ndërmarrë një udhëtim me kajak nga zona e Potamit në drejtim të Gjirit të Filikurit. Për shkak të erës së fortë dhe dallgëve të larta, ata humbën kontaktin me grupin dhe mbetën të bllokuar. Pas njoftimit, forcat e policisë nisën kërkimet përgjatë vijës bregdetare, duke i lokalizuar personat në afërsi të zonës së njohur si “Guri i Kuq”, ku u bë evakuimi i tyre në mënyrë të sigurt.
Në rastin e dytë, një shtetase australiane kërkoi ndihmën e autoriteteve pasi kishte pësuar dëmtime fizike dhe kishte mbetur e bllokuar në Gjirin e Filikurit. Për këtë rast u angazhua mjeti lundrues i Policisë Kufitare, i cili bëri të mundur lokalizimin dhe transportimin e saj drejt Portit të Himarës. Pas mbërritjes në port, turistja u dërgua menjëherë në spital për të marrë trajtimin e nevojshëm mjekësor.
Autoritetet njoftuan se turistët janë jashtë rrezikut dhe kanë shprehur mirënjohjen për ndërhyrjen e shpejtë. Policia Kufitare u ka bërë thirrje qytetarëve dhe turistëve që, në raste emergjente, të kontaktojnë numrin unik 112.