Një operacion shpëtimi është finalizuar me sukses në Kanionet e Gjipesë, ku dy turistë, babë e bijë nga Rumania, kishin mbetur të bllokuar për shkak të terrenit të thyer shkëmbor. Gjatë eksplorimit, njëri prej tyre pësoi thyerje në këmbë, çka e bëri të pamundur lëvizjen e tyre të mëtejshme.
Ndërhyrja e ekipeve të emergjencës ishte komplekse për shkak të aksesit të kufizuar në zonë. Turisti i dëmtuar u nxor nga brendësia e kanionit me barrelë nga efektivët dhe shërbimet e emergjencës, për t'u dërguar më pas në Spitalin e Himarës për trajtimin e nevojshëm mjekësor.
Në operacionin e bashkërenduar morën pjesë:
• Shërbimet zjarrfikëse të Himarës
• Komisariati i Policisë Himarë
• Shërbimet e Policisë Kufitare të Dhërmiut
• Ekipi i Urgjencës së Spitalit të Himarës
Autoritetet bënë me dije se incidente të tilla janë regjistruar edhe më parë në këtë zonë. Për shkak të relievit të vështirë dhe shtigjeve të ngushta, vizitorëve u kërkohet të tregojnë kujdes të shtuar dhe të jenë të pajisur në mënyrën e duhur për ecje në terrene të thyera.
Përditësime
Autoritetet konfirmuan se dy turistët rumunë të shpëtuar në Kanionet e Gjipesë, përfshirë një 45-vjeçar, ndodhen jashtë rrezikut për jetën. Ekipe të specializuara përdorën pajisje të teknologjisë së lartë për t'i nxjerrë nga terreni i vështirë, ndërsa të mbijetuarit shprehën falënderime për ndërhyrjen e shpejtë të shërbimeve të emergjencës.