Shërbimet e Policisë Kufitare dhe Njësisë Policore Detare kanë ndërhyrë gjatë ditës së sotme për të shmangur pasoja të rënda për jetën e 9 turistëve të huaj në dy raste të ndara në zonat bregdetare të Himarës dhe Ksamilit.
Në zonën e Filikurit në Himarë, operacioni i kërkim-shpëtimit nisi pas njoftimit nga një shtetase spanjolle se i fejuari i saj, shtetasi A. G., kishte mbetur në vështirësi pasi kajaku me të cilin lundronte ishte fundosur. Pas lokalizimit, turisti u nxor nga uji dhe u dërgua i sigurt pranë Pikës së Kontrollit Kufitar Himarë.
Një tjetër rast ndodhi rreth orës 12:45 në Ksamil, ku 8 turistë brazilianë, pjesëtarë të së njëjtës familje, kërkuan ndihmë pasi skafi i tyre plastik rrezikonte të fundosej në zonën prapa Tre Ishujve. Ndërhyrja e shpejtë me gomone dhe jet ski bëri të mundur shpëtimin e turistëve dhe rimorkimin e mjetit drejt plazhit Puerto Rico.
Të dyja operacionet u përmbyllën pa pasoja shëndetësore për turistët. Policia Kufitare ka apeluar për respektimin e rregullave të lundrimit, përdorimin e pajisjeve të sigurisë dhe shmangien e zonave që paraqesin rrezik për lundrim.