Një incident detar në Ksamil u shmang falë ndërhyrjes së shpejtë të shërbimeve të Policisë Kufitare dhe Njësisë Policore Detare. Pesë shtetas suedezë, të cilët kishin dalë për lundrim me një mjet tip pedalon, kërkuan ndihmë pasi mjeti pësoi vështirësi teknike në det të hapur, duke rrezikuar mbytjen.
Situata u konstatua nga efektivët gjatë një patrullimi rutinë në hapësirën detare të zonës. Policia ndërhyri menjëherë për t'u ofruar ndihmë turistëve, duke e tërhequr pedalonin drejt bregut. Të gjithë turistët u nxorën në tokë të sigurt dhe pa pësuar asnjë lëndim.
Pas shpëtimit, turistët falënderuan punonjësit e policisë për reagimin në kohë dhe profesionalizmin e treguar. Strukturat kufitare konfirmuan vijimin e angazhimit maksimal në hapësirat detare, veçanërisht gjatë sezonit turistik, për të garantuar sigurinë e pushuesve dhe për të parandaluar incidente të ngjashme.