Një rast i shkeljes së rregullave të lundrimit është evidentuar në zonën bregdetare të Ksamilit, ku një mjet lundrues ka rrezikuar pushuesit duke hyrë në zonën e ndaluar. Shërbimet e Policisë Kufitare dhe Njësia Policore Detare, gjatë një patrullimi rutinë në sektorin detar të Ishujve të Ksamilit, kanë konstatuar një gomone që lëvizte brenda perimetrit të sigurisë në “Plazhin Publik”.
Në zbatim të masave për garantimin e sigurisë së pushuesve, autoritetet kanë ndërhyrë menjëherë për të bllokuar mjetin lundrues. Drejtuesi i mjetit, i identifikuar si shtetasi me inicialet A. B., është ndëshkuar me masë administrative prej 500 000 lekësh të rinj, për shkelje të legjislacionit në fuqi.
Policia e Shtetit ka bërë apel për të gjithë drejtuesit e mjeteve lundruese dhe subjektet që operojnë në vijën bregdetare, duke kërkuar respektimin strikt të perimetrave të sigurisë dhe rregullave të lundrimit. Kjo ndërhyrje është pjesë e kontrolleve të intensifikuara që po kryhen përgjatë gjithë vijës bregdetare, me qëllim parandalimin e ngjarjeve që mund të vënë në rrezik jetën e qytetarëve gjatë sezonit turistik.