Një drejtues mjeti lundrues tip gomone është ndëshkuar me masë administrative prej 500 mijë lekësh të rinj, pasi shkeli perimetrin e sigurisë detare në zonën e Gjirit të Hartës, në Ksamil. Drejtuesi ka lundruar brenda hapësirës së rezervuar për pushuesit, duke krijuar një situatë me rrezik të drejtpërdrejtë për jetën dhe sigurinë e tyre.
Ngjarja është konstatuar pasi qytetarët e pranishëm në plazh kanë filmuar veprimet e rrezikshme dhe kanë njoftuar menjëherë forcat e rendit. Pas marrjes së njoftimit, shërbimet e Policisë Kufitare dhe të Njësisë Policore Detare kanë reaguar në kohë, duke bërë të mundur identifikimin e drejtuesit të mjetit dhe bllokimin e gomones.
Nëpërmjet një deklarate për mediat, Policia e Shtetit ka bërë apel drejt të gjithë përdoruesve të mjeteve lundruese që të respektojnë me rigorozitet rregullat e lundrimit dhe perimetrat e sigurisë të vendosur në zonat e plazheve. Autoritetet theksojnë se kontrollet intensive do të vijojnë përgjatë gjithë sezonit turistik për të garantuar sigurinë e pushuesve dhe për të ndëshkuar çdo shkelje sipas legjislacionit në fuqi.
Gjithashtu, policia ka falënderuar qytetarët dhe pushuesit për bashkëpunimin dhe denoncimet e tyre, të cilat mundësojnë reagim të shpejtë ndaj çdo shkeljeje që cenon sigurinë publike në zonat bregdetare.