Një operacion shpëtimi është zhvilluar në zonën e Ksamilit, pasi dy shtetas nga Ukraina rrezikuan të mbyteshin në det. Mjeti lundrues tip skaf, të cilin ata e kishin marrë me qira, nisi të fundosej si pasojë e erërave të forta dhe kushteve të rënduara atmosferike.
Ndërhyrja është kryer nga efektivët e Njësisë Speciale Delta, të cilët ndodheshin në patrullim në mbështetje të Komisariatit të Policisë Kufitare Sarandë. Falë reagimit të shpejtë, dy turistët u nxorën të sigurt në breg dhe ndodhen në gjendje të mirë shëndetësore.
Aktualisht, autoritetet po vijojnë punën për nxjerrjen e mjetit lundrues nga uji. Policia e Shtetit thekson angazhimin maksimal për garantimin e sigurisë së jetës së qytetarëve dhe turistëve në hapësirat detare të vendit, duke apeluar për kujdes të shtuar gjatë ndryshimeve të motit.