Një anije turistike në qytetin e Vlorës është ndëshkuar me masë administrative prej 400 mijë lekësh të rinj, për shkak të ndotjes akustike të shkaktuar gjatë orëve të vona të natës. Ndërhyrja e shërbimeve të policisë erdhi pas ankesave të shumta të qytetarëve për zhurmat që cënonin qetësinë publike në zonën e Ujit të Ftohtë dhe përgjatë Lungomares.
Sipas njoftimit zyrtar, rreth orës 00:52, efektivët e policisë konstatuan mjetin lundrues që po lëvizte në drejtim të Portit të Vlorës, duke transmetuar muzikë me volum mbi normat e lejuara. Në vijim të veprimeve procedurale, policia ka sekuestruar në cilësinë e provës materiale një amplifikator dhe dy bokse audio.
Ndaj administratorit të anijes, shtetasit D. S., 22-vjeçar, banues në Vlorë, dhe kapitenit të saj, shtetasit V. P., 39-vjeçar, me banim në Lezhë, ka nisur procedimi penal për veprën penale "Prishja e qetësisë publike". Autoritetet policore bënë me dije se këto kontrolle janë pjesë e masave për garantimin e rendit dhe sigurisë gjatë sezonit turistik veror dhe se monitorimi do të vijojë përgjatë gjithë vijës bregdetare për të shmangur raste të ngjashme.