Në kuadër të hetimeve për zbardhjen e vrasjes së Edmond Sulës, forcat e policisë kanë zhvilluar një operacion në zonën e Bërxullës. Bazuar në një vendim të gjykatës, efektivët kanë ushtruar kontrolle të imtësishme në 4 banesa, duke kërkuar prova materiale që mund të ndihmojnë në dokumentimin e ngjarjes.
Sipas informacioneve, vëmendja e grupit hetimor është përqendruar te pronat dhe banesat e pjesëtarëve të familjes Loci. Gjatë këtij aksioni, janë shoqëruar disa persona në komisariat, të cilët po pyeten nga hetuesit në lidhje me rrethanat e krimit dhe njohjen e tyre me viktimën. Pista kryesore e hetimit lidhet me një konflikt të mundshëm pronësie midis të ndjerit Edmond Sula dhe personave të shoqëruar.
Ngjarja për të cilën po zhvillohen hetimet ka ndodhur më 12 korrik. Sipas të dhënave, viktima, 50-vjeçari Edmond Sula, u qëllua për vdekje me një plumb pas koke në momentin kur po zbriste nga automjeti i tij për t'iu afruar banesës. Autorët dyshohet se kanë kryer një vrasje me porosi dhe janë larguar nga vendngjarja. I vetmi moment kur autori është pikasur, është nga një kamer sigurie teksa largohet në këmbë, por pa elementë të dukshëm që mund të zbulojnë identitetin e tij. Grupi hetimor vijon punën për dokumentimin e plotë ligjor të rastit dhe identifikimin e përgjegjësve.
Përditësime
Hetimet për vrasjen e Edmond Sulës në Bërxullë kanë zbuluar se autori ka përdorur një snajper. Sipas provave, ekzekutori ka pritur të fshehur pas një peme në afërsi të banesës së viktimës, për t'u larguar më pas në këmbë përmes arave drejt një zone pyjore. Policia e Tiranës konfirmoi se në të njëjtin perimetër kishte ushtruar kontrolle pak javë më parë, gjatë të cilave është sekuestruar një armë zjarri pa leje.