Policia e Tiranës, në bashkëpunim me Forcën e Posaçme “Shqiponja” dhe Komisariatin Nr. 6, ka ndërhyrë për të parandaluar një konflikt fizik mes disa grupeve të të miturve në zonën e Kombinatit. Ndërhyrja u realizua pas marrjes së informacioneve në rrugë operative se të rinjtë ishin mbledhur në rrugën “Llambi Bonata” me qëllim përplasjen mes tyre.
Gjatë kontrollit fizik të ushtruar ndaj 28 të miturve, të moshave 13 deri në 17 vjeç, efektivët e policisë gjetën dhe sekuestruan në cilësinë e provës materiale 5 armë të ftohta (mjete të mprehta si thika dhe kaçavida), si dhe disa maska. Të gjithë të miturit u shoqëruan në ambientet e komisariatit për kryerjen e veprimeve të mëtejshme procedurale.
Në përputhje me ligjin, të gjitha veprimet hetimore ndaj të rinjve u kryen në prani të prindërve të tyre dhe psikologëve. Pas konsultimit me prokurorin e çështjes, ndaj të gjithë të përfshirëve ka nisur procedimi në gjendje të lirë. Materialet procedurale i janë referuar Prokurorisë për hetime të mëtejshme lidhur me zbardhjen e plotë të rrethanave të ngjarjes.
Përditësime
Hetimet e Policisë së Tiranës zbuluan se konflikti mes 28 të miturve e ka origjinën nga një mosmarrëveshje në rrjetin social TikTok. Burime zyrtare bëjnë me dije se shkak për përplasjen është bërë pretendimi i njërit prej të rinjve për ngacmimin e motrës së tij në internet. Pjesëmarrësit ishin organizuar në grupe nga zona të ndryshme të kryeqytetit, përfshirë Selitën, Yzberishtin, 21 Dhjetorin dhe ish-Parkun. Grupet kishin paralajmëruar takimin përmes videove të publikuara në TikTok, ku shfaqeshin të veshur me të zeza.
Të miturit e përfshirë në konflikt kanë vazhduar përplasjet në rrjetin social TikTok edhe pas lënies së tyre në gjendje të lirë nga autoritetet. Sipas burimeve, të rinjtë kanë shkëmbyer mesazhe provokuese dhe kanë shpallur një takim të ri për t'u përballur fizikisht, duke sfiduar masat e marra nga Policia e Tiranës.