Vendimi për revokimin e licencave u mor pas verifikimeve të kryera nga Drejtoria e Standardeve Profesionale dhe Departamenti për Sigurinë Publike. Autoritetet konstatuan se subjektet e kontraktuara për ruajtjen e pronës në Portonovë dështuan në përmbushjen e detyrimeve ligjore.
Sipas gjetjeve zyrtare, Myrto Security 1.3A nuk menaxhonte regjistrin e hyrje-daljeve, duke lejuar individë të paautorizuar të hynin në zonën e rrethuar. Këta persona, gjatë tubimit, ushtruan dhunë fizike ndaj pjesëmarrësve dhe hodhën gurë, ndërsa personeli i sigurisë nuk ndërmori asnjë veprim parandalues.
Në rastin e kompanisë Major Security, u vërtetua se punonjësi Gerald Biba, në bashkëpunim me dy persona të tjerë të palicencuar nga subjekti, ushtruan dhunë arbitrare ndaj një protestuesi. Ata e goditën shtetasin me grusht dhe e tërhoqën zvarrë brenda rrethimit të kantierit, duke i shkaktuar dëmtime trupore. Për këto veprime është kryer arrestimi i Gerald Bibës dhe procedimi penal i personave të tjerë të përfshirë, ndërsa hetimet administrative vazhdojnë për zbardhjen e plotë të përgjegjësive.