Pas një hetimi intensiv nga Drejtoria Vendore e Policisë Vlorë dhe Prokuroria e Vlorës, janë vënë në pranga dy shtetasit e përfshirë në incidentin e datës 30 maj 2026 në Portonovë, Zvërnec. Arrestimet pasojnë atë të shtetasit Gerald Biba, i cili më herët ishte ndaluar si autor i goditjes fizike ndaj protestuesit E. S.
Sipas njoftimit zyrtar të policisë, të dyshuarit Artur Grami dhe Gazmend Vathi kanë tërhequr me forcë pjesëmarrësin në tubim dhe e kanë dërguar drejt ambientit të rezervuar për rojet, duke i shkaktuar dëmtime trupore. Gjykata e Vlorës kishte caktuar më parë masën e sigurisë "Arrest në burg" për të dy të dyshuarit, nën akuzën e veprës penale "Heqja e paligjshme e lirisë".
Verifikimet e mëtejshme të autoriteteve kanë nxjerrë në pah se asnjëri prej të ndaluarve nuk rezulton i regjistruar apo i licencuar nga ndonjë subjekt për të ushtruar aktivitetin e shërbimit privat të sigurisë fizike. Policia deklaroi se po vijojnë hetimet për të dokumentuar të gjitha përgjegjësitë ligjore të personave të përfshirë në ngjarje dhe se materialet procedurale i janë referuar organit të akuzës për veprime të mëtejshme.