Gjykata e Vlorës, nën drejtimin e gjyqtarit Etien Isak, ka lënë në burg dy punonjësit e sigurisë private, Artur Grami dhe Gazmend Vathi. Të dyshuarit u arrestuan në Tiranë nga Policia e Vlorës në bashkëpunim me atë të kryeqytetit dhe akuzohen për përfshirje në dhunën ndaj një protestuesi gjatë përplasjeve të datës 30 maj në zonën e Zvërnecit. Hetimet kanë zbuluar se Vathi dhe Grami e mbajtën protestuesin me forcë në kabinën e rojës, pasi ai ishte goditur fillimisht nga Geraldo Biba.
Sipas informacioneve të Policisë, të arrestuarit nuk rezultonin të regjistruar apo të licencuar si punonjës të sigurisë, ndonëse vepronin si pjesë e kompanisë "Major Security". Hetimet nxorën në pah se Geraldo Biba, i cili ndodhet gjithashtu nën masën "arrest me burg", ishte pronari faktik i subjektit, që formalisht ishte regjistruar në emër të Shpresa Myzyrit.
Si pasojë e shkeljeve të rënda dhe përdorimit të dhunës ndaj protestuesve dhe efektivëve të Policisë së Shtetit, institucionet përkatëse kanë revokuar licencat për kompanitë "Major Security" dhe "Myrto Security". Ngjarja ka sjellë ndryshime edhe në radhët e Policisë së Vlorës, ku Drejtori Elidon Çela është shkarkuar nga detyra për dështim në menaxhimin e situatës, duke u zëvendësuar nga Edvin Ndreu.