Pas shqetësimeve të shpeshta lidhur me manovrat e rrezikshme të drejtuesve të motomjeteve në kryeqytet, Policia Rrugore e Tiranës ka intensifikuar kontrollet në rrugët e qytetit. Si rezultat i këtij aksioni të zhvilluar në dy ditët e fundit, 19 shtetas janë proceduar penalisht për veprën “Drejtimi i automjeteve në mënyrë të parregullt”, pasi drejtonin motomjete elektrike pa lejen përkatëse të drejtimit, ndërkohë që të gjitha mjetet e tyre janë sekuestruar.
Krahas procedimeve penale, janë vendosur gjithsej 530 masa administrative për shkelje të ndryshme të rregullave të Kodit Rrugor. Sipas të dhënave zyrtare, shpërndarja e masave është si më poshtë:
• 371 masa për mosvendosjen e kaskës mbrojtëse;
• 76 masa për qarkullim në korsitë e dedikuara për biçikleta dhe në hapësirat për këmbësorët;
• 28 masa për kryerje manovrash të rrezikshme dhe mosrregullim të shpejtësisë në qendrat e banuara;
• 21 masa për shkaktim zhurmash përmes sistemit të shkarkimit të gazrave (marmitave);
• 18 masa për motomjete pa shenja dalluese ose targa;
• 10 masa për tejkalim të shpejtësisë së lejuar;
• 6 masa për drejtim pa lejen përkatëse të drejtimit.
Autoritetet policore theksuan se kontrollet do të vijojnë në mënyrë të pandërprerë me qëllim parandalimin e ngjarjeve rrugore. Policia u ka bërë apel drejtuesve që të pajisen me leje drejtimi, të përdorin kaskën mbrojtëse dhe të shmangin manovrat që cenojnë sigurinë e përdoruesve të tjerë të rrugës.