Policia Rrugore ka kryer kontrolle të shtuara në të gjithë vendin duke përdorur mjete inteligjente si dronë, radarë dhe shpejtësimëtarë, në vend të postblloqeve rutinë. Këto masa, të urdhëruara nga drejtori i përgjithshëm i Policisë së Shtetit, synojnë rritjen e sigurisë rrugore dhe parandalimin e aksidenteve, veçanërisht gjatë fundjavës në akset nacionale drejt zonave turistike dhe bregdetare, ku rritet fluksi i automjeteve.
Gjatë javës së fundit janë vendosur 26 116 masa administrative për shkelje të ndryshme, si mospërdorimi i kaskës mbrojtëse, mosvendosja e rripit të sigurimit, përdorimi i celularit gjatë drejtimit, parakalimet e gabuara, drejtimi nën efektin e alkoolit, zhurma apo manovrat e rrezikshme me automjet.
Policia ka arrestuar 48 drejtues mjetesh, prej të cilëve 26 për drejtim në gjendje të dehur dhe 22 pa leje drejtimi.
Monitorimi është ushtruar edhe në qendrat e banuara për parkimet e gabuara që pengojnë lëvizjen e mjeteve të emergjencës, krijojnë fluks në trafik ose pengojnë kalimtarët në trotuare. Në kryeqytet janë zhvendosur me karrotrec 258 automjete të parkuara në korsi të dedikuara, trotuare ose vende të ndaluara.