Drejtori i Përgjithshëm i Policisë së Shtetit, Drejtues Madhor Ilir Proda, priti në një takim kortezie në Tiranë përfaqësues të platformës EMPACT për Armët e Zjarrit dhe të projekteve FORTIFY e EVOLUXER. Platforma EMPACT është një mekanizëm kryesor i Bashkëimit Europian për adresimin e kërcënimeve serioze për sigurinë, veçanërisht trafikut të armëve dhe krimit të organizuar.
Në takim morën pjesë Carlos del Moral, Koordinator i JAD SEE, Servulo Medina Castellanos, Drejtor i Përgjithshëm i Projektit FORTIFY dhe drejtues i EVOLUXER, Sergio Vidal si dhe Alicia Barrio, përfaqësuese e Projektit EVOLUXER.
Proda theksoi angazhimin e Policisë së Shtetit për të thelluar bashkëpunimin hetimor dhe operacional me agjencitë ligjzbatuese dhe partnerët europianë, duke vënë në dispozicion kapacitetet më të mira profesionale dhe logjistike. Në deklaratën e tij, ai u shpreh: «Bashkëpunimi me shtetet partnere të Bashkimit Europian dhe strukturat përkatëse europiane, duke përfshirë bashkëpunimin e ngushtë me Europol-in dhe mbështetjen strategjike dhe financiare të Komisionit Europian, bazohet në besimin e ndërsjellë, shkëmbimin e informacionit në kohë reale, koordinimin e fortë operativ dhe forcimin e vazhdueshëm të kapaciteteve institucionale. Kjo qasje e integruar ka rritur ndjeshëm efektivitetin e reagimit të përbashkët kundër rrjeteve kriminale me rrezik të lartë. Bashkëpunimi, profesionalizmi dhe përgjegjësia mbeten shtyllat themelore mbi të cilat ndërtohet kontributi ynë brenda platformës EMPACT, me objektivin e qartë, sigurimin e një mjedisi më të sigurt për qytetarët tanë dhe partnerët tanë europianë.»
Carlos del Moral falënderoi Prodën për pritjen dhe vlerësoi punën profesionale dhe angazhimin e ekipeve të Policisë së Shtetit gjatë bashkëpunimeve operacionale. Ai shprehu gatishmërinë për të thelluar më tej bashkëpunimin dhe siguroi mbështetje të mëtejshme.
Policia shqiptare ka rol aktiv brenda platformës EMPACT për Armët e Zjarrit, duke kontribuar në goditjen e trafikut të armëve dhe formave të tjera të krimit të organizuar ndërkombëtar.