Portieri i Kombëtares së Shqipërisë, Simon Simoni, ka nisur një kapitull të ri në karrierën e tij, duke u transferuar zyrtarisht te Luzerni, klub që garon në elitën e futbollit zviceran. Pas një periudhe në Gjermani, ku ishte pjesë e Eintracht Frankfurtit, portieri ka firmosur një kontratë që do ta mbajë atë në klub deri në verën e vitit 2029.
Drejtori sportiv i Luzernit, Remo Meyer, e ka mirëpritur ardhjen e shqiptarit, duke vlerësuar potencialin dhe karakterin e tij. "Simoni na bëri përshtypje si në stërvitje ashtu edhe në ndeshje miqësore. Me të, po fitojmë një portier të talentuar me potencial të madh zhvillimi, i cili do të jetë një shtesë ideale për ekipin tonë", ka deklaruar Meyer.
Karriera e Simonit nisi të spikasë te Dinamo e Tiranës, ku regjistroi 29 ndeshje me ekipin e parë, përpara se të transferohej në Gjermani në vitin 2023. Gjatë aventurës gjermane, ai u aktivizua kryesisht me ekipin e dytë të Eintracht Frankfurtit, ndërsa për të fituar minuta në nivel profesional, u huazua te Ingolstadt 04 në Ligën e Tretë dhe te Kaiserslautern në Bundesliga 2. Portieri bëri debutimin e tij me fanellën e Kombëtares së Shqipërisë në shtator të vitit 2025.