Anatoliy Trubin, portieri ukrainas i Benficës, ka rrëfyer momentin kur doli në sulm në minutat vendimtare të ndeshjes kundër Real Madridit, në xhiron e fundit të fazës së ligës në Ligën e Kampionëve.
Duke folur pas takimit, Trubin pranoi se ishte i hutuar nga zhvillimet në fushë. “Para golit, nuk e kuptova çka po ndodhte. Më thanë ‘edhe 1 gol, edhe 1 gol’, por nuk dija për çfarë po flisnin bashkëlojtarët e mi”, u shpreh ai.
Situata u sqarua kur portieri vuri re reagimet rreth tij. “Pastaj i pashë të gjithë duke më thënë të shkoja në sulm, e pashë trajnerin duke më bërë shenjë të nisem, kështu që dola në sulm”, shtoi Trubin.
Ky veprim krijoi një skenë të rrallë në minutat e fundit. “Ishte një moment i pabesueshëm për mua”, përfundoi portieri.