Në objektin qendror të Postës së Kosovës në Prishtinë, është mbajtur ceremonia e lansimit të emisionit të ri të pullave postare, dedikuar jubileut të 250-vjetorit të Pavarësisë së Shteteve të Bashkuara të Amerikës. Ngjarja mblodhi përfaqësues të lartë të institucioneve të Republikës së Kosovës dhe të Ambasadës së SHBA-së.
Kryeministri Albin Kurti vlerësoi se kjo pullë përfaqëson një afirmim simbolik të raporteve të shkëlqyera mes dy vendeve. Ai theksoi se SHBA-ja ka ofruar mbështetje vendimtare për Kosovën në proceset e shtetndërtimit, konsolidimin e institucioneve demokratike, sigurinë dhe zhvillimin e vendit.
Kryeshefja ekzekutive e Postës së Kosovës, Nora Rraci, theksoi se pulla postare shërben si histori në miniaturë dhe si një nga format më autentike të ruajtjes së kujtesës historike. Ajo shtoi se, përkundër zhvillimeve teknologjike, Posta e Kosovës mbetet e përkushtuar ndaj traditës filatelike dhe shërbimit universal, duke vepruar si një urë komunikimi dhe besimi mes popujve.
Përditësime
Zëvendësshefja e Ambasadës së SHBA-së, Anu Prattipati, mori pjesë në ceremoninë e promovimit të pullës postare dedikuar 250-vjetorit të pavarësisë së Shteteve të Bashkuara. Prattipati e cilësoi këtë nismë të Postës së Kosovës si simbol të vlerësimit për aleancën mes dy vendeve, duke theksuar se Kosova ndan vlerat e sovranitetit dhe demokracisë. Ajo vlerësoi këtë gjest si një nder të veçantë për SHBA-në.
Në ceremoninë e promovimit të pullës postare për 250-vjetorin e themelimit të SHBA-së, Kryeministri Albin Kurti rikonfirmoi përkushtimin për ruajtjen e aleancës strategjike Kosovë-SHBA deri në vitin 2076. Në këtë ngjarje, përfaqësuesja Anu Prattipati vlerësoi lart përpjekjet e Kosovës për mbrojtjen dhe fuqizimin e sovranitetit shtetëror.