Presidenti i Republikës, Bajram Begaj, zhvillon një vizitë zyrtare në Shtetet e Bashkuara të Amerikës, në shtetin e Teksasit. Ai mori pjesë si i ftuar nderi në forumin “The American Dream at 250: Still Within Reach?”, të organizuar nga Universiteti Texas A&M dhe Shkolla George Bush për Qeverisje dhe Shërbim Publik. Ky forum, një traditë që nga viti 1982, mblidhte udhëheqës shtetesh, liderë politikë dhe ekspertë akademikë.
Në fjalimin e mbajtur përpara studentëve dhe pjesëmarrësve, Begaj ndau reflektime mbi historinë dhe demokracinë amerikane. Ai e prezantoi rrugëtimin e tij personal si dëshmi të ndryshimeve në Shqipëri: “Jam një mjek që u bë ushtarak, e më pas presidenti i një vendi që kaloi pesë dekada duke ndërtuar mure për të mbajtur larg qytetarëve të vet idetë si liria dhe qeverisja demokratike”.
Kreu i Shtetit u ndal te origjina e konceptit të ëndrrës amerikane, e cila lindi 250 vite më parë në Filadelfia si ide mbi dinjitetin njerëzor. Ai theksoi izolimin ekstrem të Shqipërisë gjatë komunizmit, kur regjimi ndërtoi rreth 750 mijë bunkerë për të penguar ndikimet e jashtme, por ëndrra amerikane depërtoi “jo me leje, por me dëshirë të madhe”.
Begaj rikujtoi momentet e vitit 1991, kur shqiptarët dolën në rrugë për liri, jo për ideologji, dhe zgjodhën Shtetet e Bashkuara si partner strategjik konkret. Ai vuri theks te rëndësia e institucioneve demokratike dhe kulturës së debatit, duke thënë se një institucion bëhet më i fortë kur sfidohet nga brenda. Në përfundim, u shpreh optimist se ëndrra amerikane mbetet e arritshme dhe ka shërbyer si busull për Shqipërinë, duke ftuar të rinjtë ta mbajnë gjallë atë si dëshmi se liria funksionon.
Gjatë vizitës, Presidenti u prit në takime nga përfaqësues të autoriteteve vendore. Ai u nderua me Çelësin e Qytetit të Bashkisë së Conroe-s dhe zhvilloi homazhe në Memorialin e Veteranëve në Montgomery County, ku përfshihen emra shqiptaro-amerikanësh në ushtrinë amerikane.