Presidenti i Republikës, Bajram Begaj, dhe Zonja e Parë, Armanda Begaj, mirëpritën fëmijët e grave ushtarake në një ceremoni festive të zhvilluar në mjediset e Presidencës. Gjatë fjalës së tij, Kreu i Shtetit vlerësoi sakrificën dhe përkushtimin e grave që shërbejnë në uniformë, duke i cilësuar ato si krenari kombëtare që përfaqësojnë denjësisht Shqipërinë.
Zonja e Parë, Armanda Begaj, në mesazhin e saj u bëri thirrje fëmijëve që të vlerësojnë përkushtimin e nënave të tyre. Ajo theksoi se shërbimi i tyre në ushtri është një burim krenarie jo vetëm për familjet, por për mbarë shoqërinë.
Programi i festës përfshiu një sërë aktivitetesh dedikuar fëmijëve:
• Lëshimin e tullumbaceve në qiell si simbolikë e ëndrrave dhe dëshirave.
• Program artistik me kërcime nga artistë të vegjël nga qyteti i Durrësit.
• Shfaqje të Teatrit të Kukullave nga artistja Shegushe Bebeti.
• Performanca artistike nga ekipi i Cirkut Kombëtar.
• Lojëra popullore, gara artistike dhe sportive në natyrë për të nxitur talentin dhe bashkëpunimin mes fëmijëve.
Aktiviteti u finalizua në një atmosferë festive, duke synuar socializimin e fëmijëve dhe vlerësimin për rolin e nënave ushtarake në shërbim të vendit.