Presidenti i Republikës, Bajram Begaj, priti më 12 maj në takim Gjeneral Major Sashko Lafchiski, shefin e Shtabit të Përgjithshëm të Republikës së Maqedonisë së Veriut.
Gjatë takimit, palët u përqendruan në forcimin e bashkëpunimit në fushën e mbrojtjes dhe sigurisë mes dy vendeve fqinje, aleate në NATO, si dhe në rëndësinë e koordinimit rajonal përballë sfidave të reja të sigurisë.
Presidenti Begaj vlerësoi kontributin e Maqedonisë së Veriut në misionet e NATO-s. Në kushtet e dinamikave të reja gjeopolitike, ai nënvizoi domosdoshmërinë e rritjes së investimeve në mbrojtje dhe siguri.
Kreu i Shtetit theksoi rëndësinë strategjike të Korridorit VIII për rajonin dhe Aleancën, duke kërkuar shtim të kontributeve në mbrojtjen kolektive dhe forcim të mëtejshëm të bashkëpunimit ndërmjet vendeve aleate.