Presidenti i Republikës, Bajram Begaj, priti më 14 maj komandantin e Komandës së Forcës së Bashkuar në Napoli, admiralin George M. Wikoff.
Presidenti Begaj e përgëzoi admiralin Wikoff për vizionin me të cilin drejton Komandën në një situatë gjeopolitike komplekse dhe vlerësoi rolin thelbësor të saj për sigurinë, paqen dhe stabilitetin në rajon. Ai theksoi se "Komanda e Forcës së Përbashkët dhe misioni i KFOR-it janë shtylla të forta për paqen dhe stabilitetin në rajon".
Në takim u diskutua partneriteti strategjik i Shqipërisë me Shtetet e Bashkuara. Presidenti Begaj shprehu se ky partneritet është shumë i çmuar për Shqipërinë dhe ka qenë transformues për Forcat e Armatosura Shqiptare. Ai vlerësoi prezencën amerikane dhe të NATO-s në rajon si të domosdoshme dhe garanci për sigurinë, stabilitetin dhe zhvillimin.
Përballë situatës së sigurisë së rrezikuar nga konfliktet në Ukrainë dhe Lindjen e Mesme, Presidenti u shpreh se duhet marrë më shumë përgjegjësi për investime në mbrojtjen kombëtare dhe kolektive. Shqipëria është e angazhuar në forcimin e kapaciteteve mbrojtëse, modernizimin e Forcave të Armatosura dhe rritjen e kontributit në Aleancë.
Begaj falënderoi SHBA-të dhe Komandën në Napoli për mbështetjen në përfshirjen e Korridorit VIII në korridoret e reja të lëvizshmërisë. Ai vlerësoi se Korridori VIII ka rëndësi strategjike për Shqipërinë, rajonin dhe NATO-n, jo vetëm për sigurinë dhe mbrojtjen, por edhe për forcimin e marrëdhënieve rajonale dhe investimin në stabilitet e prosperitet. Gjithashtu, theksoi rëndësinë e angazhimit të vazhdueshëm të SHBA-ve në KFOR për paqen në Kosovë dhe stabilitetin në Ballkanin Perëndimor.