Presidenti i Republikës, Bajram Begaj, priti më 10 prill në Tiranë gjeneralin Luciano Portolano, shef i Shtabit të Përgjithshëm të Forcave të Armatosura të Republikës së Italisë.
Gjatë takimit Begaj vlerësoi marrëdhëniet shumë të mira dhe partneritetin strategjik midis Shqipërisë dhe Italisë. Ai theksoi kontributin e vyer të Italisë në procesin e integrimit euroatlantik të Shqipërisë, si dhe mbështetjen e vazhdueshme për transformimin dhe modernizimin e Forcave të Armatosura shqiptare përmes edukimit, trajnimit dhe rritjes së kapaciteteve mbrojtëse.
Presidenti vlerësoi bashkëpunimin në kuadër të misioneve ndërkombëtare të NATO-s dhe BE-së, ku trupat shqiptare dhe italiane kanë shërbyer së bashku në operacione në vende si:
• Afganistan,
• Kosovë,
• Letoni,
• Bullgari,
• Bosnje dhe Hercegovinë.
Begaj shprehu mirënjohje për kontributin italian dhe mbështetjen e dhënë ndaj trupave shqiptare. Gjatë bisedës u theksua rëndësia e misionit KFOR për garantimin e paqes dhe sigurisë në Kosovë dhe në rajon, duke e konsideruar atë prioritet strategjik për stabilitetin afatgjatë të Ballkanit Perëndimor.
Kreu i Shtetit shprehu bindjen se bashkëpunimi mes Forcave të Armatosura të Shqipërisë dhe Italisë do të vijojë të forcohet më tej në funksion të sigurisë, paqes dhe prosperitetit të përbashkët.