Presidenti i Republikës, Bajram Begaj, zhvilloi një takim me komunitetin arbëresh në San Marzano di San Giuseppe, në provincën e Tarantos, në Itali. Gjatë kësaj vizite, Kreu i Shtetit u prit me nderime nga autoritetet vendore dhe banorët e zonës.
Ceremonia filloi me vendosjen e një kurore pranë bustit të Heroit Kombëtar, Gjergj Kastrioti Skënderbeu, në shenjë nderimi për figurën që mishëron qëndresën, dinjitetin dhe lirinë e shqiptarëve. Presidenti Begaj vlerësoi qëndresën dhe dinjitetin e arbëreshëve, të cilët kanë arritur të ruajnë për pesë shekuj gjuhën, kulturën, besimin, zakonet dhe traditat, ndërsa janë integruar plotësisht në shoqërinë italiane. Sipas kreut të shtetit, ky komunitet shërben si një urë e fuqishme dhe si një ndër themelet më të rëndësishme të miqësisë shqiptaro-italiane, marrëdhënie që sot vlerësohen si të shkëlqyera në nivel gjeopolitik dhe strategjik.
Gjatë fjalës së tij, Begaj theksoi se miqësia midis dy popujve nuk është ndërtuar vetëm në tryezat diplomatike të shekullit XXI, por është farkëtuar ndër shekuj në vatrat arbëreshe. Ai bëri thirrje për ruajtjen e gjuhës arbëreshe jo vetëm si gjuhë kujtese, por si një element i gjallë që duhet t’u përcillet brezave të rinj përmes komunikimit familjar.
"Një gjuhë nuk mbijeton vetëm në libra apo në ligje. Ajo mbijeton kur prindërit ua flasin fëmijëve dhe kur gjyshërit ua mësojnë nipërve", u shpreh Presidenti. Ai nënvizoi se mbijetesa e kësaj trashëgimie kërkon angazhimin e përbashkët të komuniteteve, institucioneve, universiteteve, diasporës, si dhe të Shqipërisë e Kosovës.
Përditësime
Presidenti Bajram Begaj vlerësoi mikpritjen italiane gjatë vizitës në provincën e Tarantos, në rajonin e Pulias. Kreu i shtetit deklaroi se shqiptarët në Itali kanë gjetur një atdhe të dytë, pa e humbur lidhjen me të parin. Begaj vuri theksin te rezistenca kulturore e arbëreshëve, të cilët ruajtën gjuhën dhe traditat shekullore edhe në periudhat kur ato nuk gjenin mbështetje në sistemin arsimor.