Ministri për Evropën dhe Punët e Jashtme, Ferit Hoxha, vizitoi Vena di Maida në rajonin e Kalabrisë, në Itali, ku mori pjesë në edicionin e XXXI të Manifestimit Kulturor Folklorik për Vlerësimin e Pakicave Gjuhësore. Aktiviteti u organizua nga Shoqata Kulturore “Progetto Caraffa”.
Në fjalën e tij, ministri Hoxha vlerësoi lidhjet e ngushta mes dy vendeve, duke theksuar se arbëreshët përbëjnë një urë të gjallë lidhëse midis Shqipërisë dhe Italisë. Ai nënvizoi se ky komunitet ka arritur të ruajë gjuhën shqipe, zakonet dhe identitetin kombëtar për më shumë se pesë shekuj përmes familjes, shkollës, shoqatave kulturore dhe jetës komunitare.
Gjatë kësaj vizite, ministri Hoxha zhvilloi një takim me kryetarin e bashkisë së Vena di Maida, Salvatore Paone, të cilin e falënderoi për mikpritjen. Në aktivitet ishin të pranishëm edhe personalitete të botës akademike arbëreshe, mes të cilëve Prof. Francesco Stirparo, Prof. Cettina Mazzei dhe Prof. Francesco Altimari. Sipas ministrit, arbëreshët mbeten një pasuri e çmuar dhe një dëshmi e forcës së identitetit kulturor shqiptar në hapësirën evropiane.