Në komunat arbëreshe të Kalabrisë, përfaqësues nga Kosova, Shqipëria, Maqedonia e Veriut, Mali i Zi, Lugina e Preshevës, diaspora dhe komunitetet lokale janë bërë bashkë në një aktivitet që ndërthur trashëgiminë kulturore me solidaritetin politik. Organizuar nga Unioni i Bashkive Shqiptare në Rajon (UBSHR), takimi zhvillohet në periudhën 18–20 shtator dhe ka mbledhur rreth 60 përfaqësues, përfshirë kryetarë komunash dhe personalitete nga fusha të ndryshme.
Simbolika e solidaritetit
Përtej agjendës zyrtare të forumit, pjesëmarrësit dërguan një mesazh mbështetjeje për ish-pjesëtarët e Ushtrisë Çlirimtare të Kosovës (UÇK), duke kërkuar “Liri për çlirimtarët”. Ky qëndrim ndërlidhet me zhvillimet e fundit në proceset gjyqësore që po zhvillohen në Hagë ndaj ish-krerëve dhe pjesëtarëve të kësaj force.
Zhvillimi i turizmit dhe kulturës
Forumi zhvillohet në kuadër të projektit “EXPO ARBËRIA”, me qëllim thellimin e bashkëpunimit mes bashkive shqiptare dhe atyre arbëreshe. Aktivitetet janë përqendruar në Spezzano Albanese, ndërsa delegacioni ka vizituar edhe qendra të tjera historike si Frascineto, Civita dhe San Demetrio Corone.
Një tjetër element qendror është platforma MUZA, e cila shënon edicionin e pestë. Kjo nismë, që prej pesë vitesh promovon trashëgiminë përmes modës dhe industrive krijuese, këtë vit është fokusuar në përshtatjen e veshjeve, riteve dhe simboleve arbëreshe në gjuhën e krijimtarisë bashkëkohore. Organizatorët synojnë që këto katunde të promovohen si destinacione të rëndësishme të turizmit kulturor, duke krijuar lidhje të reja në hapësirën europiane.