Presidentja e Republikës së Kosovës, Vjosa Osmani, ndodhet në vizitë në komunën e Gjakovës pas vërshimeve të shkaktuara nga reshjet e dendura të shiut që përfshinin vendin më 6 janar 2026. Kjo vizitë synon vlerësimin e situatës dhe mbështetjen për banorët e prekur.
Ajo u takua me kryetarin e Gjakovës, Ardian Gjini, dhe ekipin e tij që monitorojnë situatën. Osmani viziton familjet e prekura nga përmbytjet, si dhe lokacionet që vazhdojnë të jenë në kushte të vështira. Gjithashtu, ajo pritet të vizitojë Shtabin Emergjent të komunës për të diskutuar masat e marra.
Vërshimet kanë shkaktuar dëme të konsiderueshme në Gjakovë, ku u përmbytën rrugë, oborre dhe disa objekte banimi, duke penguar qarkullimin dhe duke krijuar vështirësi për qytetarët. Autoritetet komunale aktivizuan menjëherë Shtabin Emergjent, ndërsa ekipet e emergjencës, zjarrfikësit dhe Policia e Kosovës ndërhynë në terren për të ndihmuar banorët. Deri tani nuk raportohet për viktima në njerëz.
Pas Gjakovës, Osmani vazhdon vizitën në Malishevë, ku takohet me kryetarin Ekrem Kastrati. Ajo do të vizitojë dy lokacione që kanë pësuar dëme të mëdha nga vërshimet. Në të dy komunat, presidentja pritet të ndihmojë disa familje me pako ndihmash.