Qyteti i Prishtinës ndodhet në fazën përmbyllëse të përgatitjeve për një nga ngjarjet më të mëdha muzikore dhe kulturore në rajon, Sunny Hill Festival. Edicioni i sivjetmë, i cili do të nisë të premten, pritet të mbledhë mijëra adhurues të muzikës nga Kosova dhe vende të ndryshme të botës.
Në një prononcim për emisionin “Ora Shtatë” në Klan Kosova, njëri nga organizatorët, Fat Gjakova, konfirmoi se procesi i organizimit po ecën sipas parashikimeve. Ai bëri të ditur se ekipet janë përqendruar në finalizimin e skenave, ndërsa puna për produksionin kishte nisur prej një ose dy javësh.
“Gjithçka po shkon sipas planit. Këto ditë po përfundojnë të gjitha skenat. Jemi shumë afër dhe mezi po presim të bëhet e premte”, u shpreh Fat Gjakova.
Lidhur me pjesëmarrjen e artistëve, organizatorët kanë bërë me dije se ardhja e tyre në Prishtinë nis ditën e sotme. Pritet që deri nesër të gjithë interpretuesit të jenë mbërritur në vend për të nisur përgatitjet përfundimtare përpara hapjes zyrtare të festivalit. Sunny Hill Festival vazhdon të mbetet një platformë që tërheq emra të njohur të skenës ndërkombëtare, duke e pozicionuar kryeqytetin kosovar në qendër të vëmendjes për adhuruesit e muzikës.