Departamenti Special i Gjykatës Themelore në Prishtinë ka vendosur caktimin e masës së paraburgimit për M.J. dhe M.B., pasi Prokuroria Speciale e Republikës së Kosovës i akuzon ata për veprën penale “Krime lufte kundër popullatës civile”, të sanksionuar me nenin 142 lidhur me nenin 22 të ish-Ligjit Penal të ish-RSFJ-së.
Sipas njoftimit të Gjykatës, kjo masë është e domosdoshme për zhvillimin e papenguar të procedurës penale. Gjykata argumentoi se ekziston rrezik real i arratisjes së të pandehurve, duke theksuar se ata janë shtetas të Serbisë, fakt që mund t’i bëjë të paarritshëm për organet e drejtësisë së Kosovës. Po ashtu, u theksua rreziku i ndikimit te provat dhe dëshmitarët.
Hetimet për këtë rast janë intensifikuar pas lokalizimit të një vendi në Kalludër të Vogël, ku dyshohet se ndodhet një varrezë masive. Më 27 korrik 2026, hetuesit e Policisë së Kosovës nga sektori për hetimin e personave të zhdukur gjetën mbetje eshtërore, përfshirë pjesë të kafkës, fragmente skeletore dhe veshje që mendohet se u përkasin viktimave të vitit 1999. Dyshohet se civilët shqiptarë, të cilët po lëviznin drejt Malit të Zi, u ndaluan nga pjesëtarë të Mbrojtjes Territoriale të forcave jugosllave, u plaçkitën dhe u vranë.
Palët e pakënaqura kanë të drejtë ankese ndaj këtij vendimi në Gjykatën e Apelit, përmes Gjykatës Themelore në Prishtinë.