Prokuroria Speciale e Republikës së Kosovës ka paraqitur kërkesë në Gjykatën Themelore në Prishtinë për caktimin e masës së paraburgimit ndaj dy personave, të identifikuar me inicialet M.J. dhe M.B., të cilët dyshohen për kryerjen e veprës penale “Krime lufte kundër popullsisë civile”.
Ndalimi i tyre është realizuar nga Policia e Kosovës pas hetimeve lidhur me zbulimin e një varreze masive në territorin e komunës së Zubin Potokut. Sipas autoriteteve, në këtë lokacion janë gjetur mbetje mortore që dyshohet se u përkasin 23 intelektualëve nga Mitrovica, të cilët janë vrarë gjatë masakrës së ndodhur më 19 prill 1999.
Zëdhënësja e Prokurorisë Speciale, Arbnora Luta, ka konfirmuar se institucionet përkatëse, në bazë të urdhrave të lëshuara nga Gjykata Themelore në Prishtinë, kanë përfunduar procedurat e zhvarrimit, autopsisë dhe identifikimit të mbetjeve mortore në lokacionin e përmendur. Dy të dyshuarit akuzohen se kanë marrë pjesë në këto krime gjatë periudhës së konfliktit në vitin 1999.
Seanca për caktimin e masës së sigurisë ndaj të dyshuarve është planifikuar të mbahet sot në orën 13:00. Prokuroria Speciale ka theksuar se hetimet për këtë rast mbeten aktive dhe se, për hir të ruajtjes së integritetit të procedurës penale, në këtë fazë nuk do të bëhen publike detaje të mëtejshme.
Përditësime
Prokuroria Speciale ka kërkuar masën e paraburgimit prej 48 orësh për dy shtetas serbë, M.J. dhe M.B., të dyshuar për krime lufte. Sipas hetimeve, në fshatin Kalludër të komunës së Zubin Potokut është zbuluar një varrezë masive me mbetjet mortore të 23 civilëve. Kryeministri i Kosovës, Albin Kurti, e cilësoi këtë zbulim si dëshmi kyçe për krimet e luftës që kërkon zbardhje të plotë. Për shkak të ndjeshmërisë së rastit, gjyqtari i procedurës paraprake ka vendosur që seanca të mbahet me dyer të mbyllura.
Gjykata Themelore në Prishtinë ka nisur seancën për caktimin e masës së paraburgimit ndaj dy të dyshuarve për krime lufte në Zubin Potok. Prokurorja e Prokurorisë Speciale, Arbnora Luta, ka bërë të ditur se të dyshuarit akuzohen për vrasje, maltretim dhe dëbim të popullsisë civile në fshatin Kalludër e Vogël. Në vijim të hetimeve, Prokuroria Speciale u ka bërë thirrje mediave të shmangin publikimin e informacioneve të pakonfirmuara lidhur me gërmimet në këtë lokacion, me qëllim ruajtjen e integritetit të procesit hetimor.
Gjykata Themelore në Prishtinë ka caktuar masën e paraburgimit prej një muaji ndaj të dyshuarve M.J. dhe M.B., të cilët akuzohen për krime lufte në Zubin Potok. Trupi gjykues e vlerësoi paraburgimin si të nevojshëm për shkak të rrezikut të arratisjes, pasi të pandehurit janë shtetas të Serbisë, si dhe për shkak të mundësisë së ndikimit në provat materiale dhe dëshmitarët.
Autoritetet kanë identifikuar të dyshuarit si Momir Jakshiq dhe Miljko Bishevac. Prokuroria Speciale ka përcaktuar rolet e tyre në kuadër të të ashtuquajturës 'Mbrojtje Territoriale', ku Jakshiq akuzohet si pjesëtar, ndërsa Bishevac si komandant. Për të siguruar prova shtesë, Policia e Kosovës ka zhvilluar bastisje në banesat e tyre në veri të vendit. Seanca dëgjimore për caktimin e masës së paraburgimit ka zgjatur dy orë dhe është zhvilluar me dyer të mbyllura, për shkak të ndjeshmërisë së provave dhe ruajtjes së integritetit të procesit.