Gjykata Themelore në Prishtinë, Departamenti Special, më 3 mars 2026, vendosi lidhur me masën e sigurisë ndaj pesë serbëve të arrestuar në Skenderaj për veprën penale të krimeve lufte kundër popullatës civile.
Gjyqtari i procedurës paraprake miratoi kërkesën e Prokurorisë Speciale të Republikës së Kosovës për të pandehurit G.T., R.K., S.T. dhe P.T., duke iu caktuar atyre masën e paraburgimit në kohëzgjatje prej një muaji për secilin.
Kërkesa për N.T. u refuzua, pasi nuk u vërtetua dyshimi i bazuar se ai ka kryer veprën penale.
Të pandehurit ngarkohen me krime lufte kundër popullatës civile, sipas neneve 142 dhe 22 të Kodit Penal të ish-RSFJ-së, si dhe neneve 31 dhe 153 të Kodit Penal të Republikës së Kosovës. Këto veprime bien ndesh me nenet 3 dhe 4 të Konventave të Gjenevës, nenet 4 dhe 5 të Protokollit 2, si dhe protokollet shtesë.
Gjykata vlerësoi se paraburgimi është masë adekuate për shkak të rrezikut të arratisjes – të pandehurit posedojnë pasaporta të Republikës së Serbisë dhe mund të largohen nga Kosova. Po ashtu, ekziston rreziku që ata të ndikojnë te dëshmitarët dhe të dëmtuarit nëse lihen në liri.
Palët e pakënaqura kanë të drejtë të ankohen në Gjykatën e Apelit, përmes Gjykatës Themelore në Prishtinë.