Gjykata Themelore në Prishtinë ka miratuar kërkesën e Prokurorisë Speciale të Republikës së Kosovës për caktimin e masës së paraburgimit ndaj pesë të pandehurve të arrestuar të dielën. Vendimi u mor pas mbajtjes së seancës dëgjimore, ku gjyqtari i procedurës paraprake konstatoi se ekzistojnë arsye ligjore për këtë masë.
Sipas njoftimit zyrtar të gjykatës, ekziston rreziku real që të pandehurit të arratisen, pasi si shtetas të Serbisë, ata mund të bëhen të paarritshëm për organet e drejtësisë, duke pamundësuar sigurimin e prezencës së tyre në procedurë. Gjithashtu, autoritetet theksuan rrezikun se, nëse lihen në liri, të dyshuarit mund të ndikojnë në prova ose te dëshmitarët, duke penguar rrjedhën normale të hetimeve.
Pesë të arrestuarit, të cilët ishin pjesëtarë të Policisë së Serbisë në vitin 1999, dyshohen për krime lufte në lidhje me masakrën e Reçakut. Procedura ndaj tyre po zhvillohet në kuadër të hetimeve për çështjen e njohur si Reçaku II.
Përditësime
Dëshmitari i masakrës së Reçakut, Ramë Shabani, ka konfirmuar gatishmërinë për të dëshmuar kundër pesë të dyshuarve të arrestuar. Pas 27 vitesh pritje, ai kërkoi dënim maksimal për autorët, ndonëse paralajmëroi se identifikimi vizual mund të jetë sfidues për shkak të maskave që ata mbanin gjatë krimit. Gjithashtu, Shabani i ka kërkuar Prokurorisë zgjerimin e hetimeve ndaj komandantëve të Policisë në Shtime dhe Ferizaj, me qëllim zbardhjen e plotë të përgjegjësisë.