Një incident i rëndë ka ndodhur në qendër të Prishtinës, ku një person është sulmuar me thikë në sheshin “Skënderbeu”. Ngjarja është regjistruar rreth orës 21:20 të mbrëmjes së së shtunës, më 25 korrik 2026.
Sipas njoftimit zyrtar nga Policia e Kosovës, viktima, shtetas kosovar, është dërguar urgjentisht për trajtim mjekësor. Mjekët kanë konstatuar se ai ka marrë dy plagë nga thika në shpinë, të cilat i kanë shkaktuar dëmtime edhe në organet vitale. Gjendja shëndetësore e të lënduarit vlerësohet si e rëndë.
Në lidhje me këtë rast, prokurori kujdestar ka urdhëruar inicimin e hetimeve për veprën penale “vrasje në tentativë”. Deri në këto momente, autoritetet nuk kanë arritur të identifikojnë apo të arrestojnë personin e dyshuar, i cili u largua nga vendi i ngjarjes menjëherë pas sulmit. Hetimet për zbardhjen e plotë të rrethanave të kësaj ngjarjeje vijojnë.