Dy persona janë proceduar penalisht nga Policia e Bulqizës pasi dyshohet se kanë ndezur zjarr në një sipërfaqe toke në fshatin Dragu, duke shkaktuar djegien e rreth 7 dynymë me bimësi. Ngjarja ndodhi ditën e djeshme, sipas hetimeve paraprake.
Specialistët për Hetimin e Krimeve në Komisariatin e Policisë Bulqizë kryen veprimet hetimore për zbardhjen e rastit dhe referuan materialet në Prokurori. Procedimi penal nisi ndaj shtetasve P. B., 67 vjeç, dhe B. B., 59 vjeç, banues në Fushë-Bulqizë.
Materialet procedurale iu referuan Prokurorisë së Dibrës për veprën penale “Shkatërrimi me zjarr i pyjeve dhe i mjedisit pyjor”.
Drejtoria Vendore e Policisë Dibrës apelon te qytetarët që në asnjë rast të mos ndezin zjarre, pasi do të përballen me ligjin. Gjithashtu, fton për denoncim në numrin 112 të çdo rasti të tillë ose paligjshmërie të përgjithshme, duke garantuar anonimat, reagim të shpejtë dhe të paanshëm.