Ministria e Financave ka dërguar për konsultim institucioneve të linjës projektligjin e rishikuar “Për sigurimin e detyrueshëm të banesave nga tërmetet”, të cilit tani i janë bashkëngjitur edhe përmbytjet. Dokumenti është dërguar te Autoriteti i Mbikëqyrjes Financiare, Instituti i Gjeoshkencave dhe Agjencia e Mbrojtjes Civile.
Skema e sigurimit të detyrueshëm do të zbatohet për banesat, njësitë tregtare dhe zyrat. Ndërkaq, nuk do të sigurohen ndërtesat që përbëhen nga argjile apo qerpiçi, strukturat me fibër-kallam apo objektet e lëvizshme.
Në rast tërmetesh ose përmbytjesh, do të kompensohen vetëm dëmet materiale deri në një masë të caktuar. Nuk parashikohet kompensim për dëmtimet fizike, humbjet e jetëve, sendet brenda banesës, humbjet financiare nga ndërprerja e veprimtarisë apo fitimi i munguar.
Sigurimi do të vlejë njësoj për qytetarët shqiptarë dhe shtetasit e huaj. Kontrata e sigurimit do të përmbajë emrin dhe të dhënat e të siguruarit, të dhënat mbi pronën, datën e fillimit dhe mbarimit të policës, si dhe shumën dhe primin e sigurimit.
Fondi për Sigurimin nga Tërmetet dhe Përmbytjet financohet nga primet e qytetarëve dhe bizneseve, komisionet nga risigurimi, të ardhurat nga investimet, mbështetja e buxhetit të shtetit, grante, donacione dhe të ardhura të tjera ligjore.
Qytetarët dhe bizneset që nuk kryejnë sigurimin e detyrueshëm do të kenë kufizime në aksesimin e shërbimeve si:
• shërbimet në Kadastër;
• përgatitja dhe regjistrimi i kontratave vullnetare të sigurimit;
• disa shërbime në platformën e-Albania;
• shërbimet në Qendrën Kombëtare të Biznesit.